Email Somat ke Ngkong Sinterklas

Assalamualaikum Ngkong Sinterklas,

Salam Ngkong, apa kabarnye nih Ngkong? Moga-moga Ngkong kagak lupa sama anak Betawi kesayangan Ngkong, Somat. Sekarang Somat lagi di Singapura nih Ngkong, ngelanjutin sekolah aye disini. Alhamdullillah Nyak sama Babe masih bisa nyekolahin aye sama adek aye, apalagi sampe keluar negeri, Ngkong.

Si Ijul temen aye nyang Natalan kemarin ngobrol sama aye lewat komputer. Sekarang Ijul noh sekolah di Kanada. Canggih bener dah hari gini Ngkong, segala macem ade, segala macem bisa. Si Ijul katanya udah malu ngirim surat ke Ngkong Sinterklas, "Udah gede sekarang kita Mat, kagak perlu lagi nulis-nulis surat ke Sinterklas... Lu ape kagak malu?" Enggak kok Ngkong, aye ga malu, kalo-kalo aye udah kagak boleh lagi minta kado natal, aye mau jaga silahturahim aje sama Ngkong gitu. Kan anak soleh ya soleh aje kan Ngkong.

Aye sekarang tinggal ade ngontrak rumah sama temen-temen ane nyang baru. Orang kelingnya ada 3, sama orang dari Vietnam ade juga ntu. Ngkong tenang aje, aye anak Betawi yang inget sama pesen Nyak Babe aye, harus rukun, baik sama orang, rajin ngaji sama ga boleh lupa maen pukulan.

Jujur aje aye memang nulis mau minta kado natal sama Ngkong, Peci nyang dulu ngkong bawain udah buluk, emang namanye ntu barang udah bangkotan, kira-kira aye boleh minta peci baru Ngkong? Aye ga mau minta banyak-banyak sama Ngkong, soalnya malu juga inget sama umur aye. Hehe.

Tapi gini Ngkong, aye mau minta tolong sama Ngkong, tapi ntu kalo kagak ngerepotin Ngkong aje. Sejak aye belajar bisnis di sini, aye udah ngerti kalo segala barang kagak ade nyang gratis atau obralan, jadi ntar Ngkong pasti bakalan capek, ntar aye kasih suguhan disini pas mau nganter hadiah aye! Ngkong, ini bukan aye mau nyogok lho, aye cuman mau kasih Ngkong timbal balik aje, Ngkong entar nganterin hadiah-hadiah buat Nyak sama Babe aye nyang di Jakarte, ama temen-temen aye nyang lagi ngerantau nyari ilmu... Terus aye suguhin nasi goreng kambing nyang aye masak sendiri, sama bikinin susu jahe sama madu nyang anget, biar Ngkong ntar mau narik dokar terbangnya udah seger!

Ade si Ijul noh di Kanada, trus ade si Budi temen aye nyang natalan juga. Dia pindah ke Jogja tadinya tinggal deket rumah aye, ade Ncingnye nyang kerja di Keraton dulu, dipanggil lagi sekarang katanye ade rapat besar istana. Aye kagak ngarti dah. Terus ada si Minah nyang masih di Jakarte. Kesian dia kagak sekolah lagi aye denger terakhir kabarnya dari Budi, sekarang bantuin mpoknye jaga warung...

Terus ade juga si Nana nyang pindah ke Australi. Temen-temen aye pada jauh Ngkong, kangen aye mainan gobak sodor ame mereka, saban hari berangkat bebarengan ke sekolahan, ngeliat si Budi kalo lagi ngejar layangan... Demen banget tuh anak ngejublag terus nangis... Udah aye bilangin mangkannye jangan ngunyah mulu kerjaan.

Itu nyang dibungkus di meja makan aye ya Ngkong, nyang rada gede bungkusannye itu buat Nyak-Babe aye, terus nyang biru itu buat adek aye, aye beliin pakean buat die, biar makin cantik gitu.

Nyang bungkusnya merah itu buat Ijul, Ijo buat Budi, jingga buat Minah, ame nyang ungu buat Nana. Barangnya kecil-kecil Ngkong, buat Ijul aye beliin sarung tenun bagus biar die kagak lupa kalau die anak Betawi.

Buat Budi aye beliin kue-kue biskuit nyang 'low fat' ama keripik singkong nyang aye goreng sendiri, modal gula garem doang ama singkongnya ada kebon nganggur deket kontrakan aye. Tenang Ngkong! Aye kagak nyolong, ntu aye udah bilang 'assalamualaikum' tiga kali kagak ade nyang jawab, aye permisi masuk terus minta ijin ama penghuni situ sapa-sapa tau ada nyang nangkring kan.

Buat Minah aye beliin ada nih boneka kucing nyang tanganya bisa ngayun-ngayun maju mundur Ngkong, lucu bener dah ini kucing. Dulu si Minah soalnya punya kucing juga demen bener nyaut-nyautin gangsingan ane, ini bonekanya mirip kucingnya Minah. Orang Tionghoa sini demen banget majang boneka ginian depan rumah ame dagangan, apa kagak takut dicolong ye?

Untuk si Nana nyang di Australi aye beliin buku Ngkong, dia suka bener baca buku nopel. Ini aye beliin ini nopel lagi ngetop banget kagak tau kenape, ceritanye cinta segitige Ngkong. Ada ini cewek nyang naksir banget ama atu laki nyang kalo aye pikir mirip jenglot, ngisep darah. Tapi ini anak perempuan juga naksir ama atu lagi laki nyang kayaknya anjing jadi-jadian . Tapi ngetop banget disini Ngkong, jadi aye beliin buat Nana.

Aye cuman harap mereka suka same hadiah nyang aye, ini aye ga minta duit siapa-siapa buat beliin kado natal, aye sisih uang jajan aye jadi bisa beli kado. Inget-inget sama pesen Babe aye: "Mat, ntaran lu udah jadi orang gede, kerjanya gedongan, elu kagak boleh lupa ame temen-temenlu. Kudu inget silahturrahmi sama mereka, kali-kali lu ada rejeki lebih juga kagak boleh lupa dibagi-bagi." Jadi aye cuman ngejalanin amanat orangtua aye.

Ngkong, kontrakan aye kagak ade cerobong asepnya. Ntu kalau Ngkong mau parkir ntu dokar terbang diatap bisa sih, tapi kayaknye Ngkong parkir di lapangan bola belakang aje, hukum negara sini matre Ngkong, salah-salah Ngkong didenda ntar berabe.

Oh iye, Ngkong kalau mau nasi gorengnya pake telor, dibales ya Ngkong surat aye, biar aye siapin telornye mau digoreng ato didadar gitu. Maaf ye Ngkong kalo surat aye rada panjang, kan udah kagak pake kertas lagi soalnye.

Bujubuneng aye ampir aje lupa! Astaghfirullah, ntar takut ngkong nyasar, kontrakan aye aye pasang lampu petromak ya Ngkong! Aye cantolin di jendela aye aje.



Wassalam, anak Betawi kesayangan Ngkong

Somat.